.png)
2026 Kirgistan ævintýraferð - einstakt verð
Kirgistan er staður óspilltrar villtrar náttúru þar sem fólkið heldur enn í fornar hefðir sínar, siði og menningu.
Kirgistan er landlukt ríki í Mið-Asíu með landamæri að Kína í austri, Kasakstan í norðri, Tadsíkistan í suðri og Úsbekistan í vestri. Í fjöllunum búa hirðingjar sem hafa ekki breytt sínum lífsstíl í hundruðir ára. Landið er umkringt Tíbet-fjöllunum sem eru hluti af Himalaya fjallgarðinum og eru heimkynni hirðingjanna sem hér búa.
Kirgisar eru meirihluti íbúa landsins en þar búa líka stórir hópar Rússa og Úsbeka. Kirgiska er tyrkískt mál og er opinbert mál landsins ásamt rússnesku. 90% íbúa Kirgistans eru múslimar og meirihlutinn aðhyllist súnní íslam. Menning Kirgistans ber merki um áhrif Rússa, Mongóla og Írana.
Íbúarnir eru um 6,5 milljón og býr um 1 milljón þeirra í höfuðborginni Bishkek sem jafnframt er stærsta borg landsins. Ferðadagskráin er hönnuð fyrir fróðleiksfúst fólk sem vill upplifa eitthvað nýtt og framandi.
Markhópurinn er fólk sem hefur áhuga á náttúru og menningu og vill bregða undir sig betri fætinum til að skoða nokkur náttúruundur sem verða á vegi okkar. Fólk sem vill kynnast heimamönnum og upplifa þeirra lífsstíl mun njóta sín vel í þessari ferð. Hópurinn verður að hámarki 15 manns.
Gistingin sem boðið er upp á er þægileg og örugg. Í höfuðborginni er gist á 4ra stjörnu hóteli með loftkælingu. Annars er gist á hótelum og gistiheimilum en auk þess verður gist tvær nætur í Yurt hirðingjatjöldum.
Búast má við nokkrum gönguferðum sem geta verið allt frá 2 km upp í 12 km, en lengsti göngudagurinn er líka valkvæður.
.jpg)
Kirgistan hefur verið hluti af ýmsum menningarsvæðum og stórveldum. Landið var hluti af Silkiveginum og öðrum verslunarleiðum um Mið-Asíu.
Ferðaþjónusta er vaxandi í Kirgistan og landið dregur að sér ferðamenn sem vilja uppgötva náttúruna og sögu fólksins sem byggir landið. Kirgistan er talið stöðugt land fyrir ferðamann og pólitísk vandamál ekki til staðar um þessar mundir. Smáglæpir og þjófnaður eiga á sér stað þar eins og víðast hvar annars staðar.
Ferðin er á einstöku verði og hægt að bóka sig á heimasíðu Fiðrildaferða
Verð:
Tvíbýli 489.000 kr. á manninn
Einbýli 599.000 kr.
Maí og júní mánuður er upplagðir til ferðalaga til Kirgistan. Þá er vorið komið og blómlegt um að litast.
Kvöldin inn til fjalla eru svöl en í höfuðborginni getur hitinn farið upp í 28-30°C yfir hádaginn. Upp til fjalla þar sem gist er í Yurt tjöldum getur hitastigið á kvöldin og nóttunni farið niður í 5°C. Úrkoma er venjulega ekki mikil á þessum árstíma.
Handhafar íslenskra vegabréfa þurfa ekki vegabréfsáritun og mega dvelja í landinu í allt að 60 daga.
Tímamismunurinn er 6 tímar. Kirgistan er 6 tímum á undan Íslandi.
Handhafar íslenskra vegabréfa þurfa ekki vegabréfsáritun og mega dvelja í landinu í allt að 60 daga. Hópurinn verður að hámarki 15 manns.
Fiðrildaferðir í samstarfi við Flandrr og Kyrgyz Adventure Travel ferðaskipuleggjanda í Kirgistan, bjóða upp á þessa nýju og spennandi ferð.
Fiðrildaferðir eru söluaðili ferðanna og sjá um bókanir, innheimtu, skilmála og tryggingar skv. ferðakskrifstofuleyfi nr.2024-031 gefnu út af Ferðamálastofu.
Fiðrildaferðir bjóða upp á ferðir til framandi slóða með áherslu á samfélags- og menningarferðaþjónustu.
Þarlendur leiðsögumaður verður með í för allan tímann og fararstjóri f.h. Flandrr er Ágústa Sigrún Ágústsdóttir.
Ágústa Sigrún er menntaður leiðsögumaður frá Leiðsöguskóla Íslands og hefur unnið við fararstjórn á Ítalíu, Króatíu og Slóveníu yfir 20 ár. Hún hefur einnig starfað sem leiðsögumaður á Íslandi fyrir ítölsku- og enskumælandi ferðamenn um Ísland. Hún kannar nú nýjar slóðir.
Ágústa Sigrún heldur úti ferðabloggi undir nafninu Flandrr ferðamiðstöð þar sem hún varpar upp áhugaverðum vinklum um ýmislegt tengt ferðalögum: www.flandrr.is
Innifalið: Flogið með Icelandair frá Íslandi til Brussel og þaðan áfram með Turkish Airlines. Gisting með morgunverði í átta nætur á hóteli/gistiheimilum og tvær nætur í Yurt tjöldum. Þægileg rúta með loftkælingu. Reyndur bílstjóri fylgir hópnum allan tímann. Sérstakur bíll með farangur. Enskumælandi staðarleiðsögumaður allan tímann og íslenskur fararstjóri. Fullt fæði allan tímann. nema hádegisverður tvo daga. Einn líter af vatni á hverjum degi. Allt sem talið er upp í ferðalýsingu, nema annað sé tekið fram.
Ekki innifalið: Þjórfé. Áfengir drykkir. Valkvæð dægradvöl og annað sem sérstaklega er tekið fram að sé ekki innifalið í ferðalýsingu.
26. maí - dagur 1 - Ferðadagur
Flogið er í með Icelandair til Brussel kl. 07:35 um morguninn og þaðan áfram til Istanbúl með Turkish Airlines. Þriðji leggurinn er frá Istanbúl til Manas flugvallar í Bishkek, höfuðborgar Kirgistan. Lent er kl. 04:30 að morgni næsta dags. Þá er klukkan 22:30 að íslenskum tíma. Hægt verður að innrita sig strax við komu.
27. maí dagur 2 - Koma til Bishkek og skoðunarferð um borgina.
Rútur bíða okkur á flugvellinum þegar við lendum en um 40 km eru frá flugvellinum til höfuðborgarinnar.
Við innritum okkur eldsnemma um morguninn inn á hótel Plaza, sem er 4ra stjörnu hótel og hvílum okkur eftir flugin.
Hádegisverður ekki innifalinn.
Eftir hádegið er farið í borgarferð þar sem heimsækjum Ala-Too torgið sem er hjarta borgarinnar og þar sem ríkissögusafnið er staðsett. Bishkek er þekkt sem grænasta borgin í Mið-Asíu, þökk sé ótal görðum og göngustígum sem gera borgina að frábærum stað til að búa. Við heimsækjum einnig hinn fræga Osh bazar markað. Um leið og stigið er inn á markaðinn hverfum við inn í austurlenska stemningu með fjölda fólks og mikla fjölbreytni í vörum og litagleði.
Um kvöldið borðum við á skemmtilegum veitingastað í borginni þar sem við fáum að smakka dýrindis kirgiska þjóðarrétti.
Gist á Plaza hótel um nóttina. https://www.plazahotel.kg/en/
28. maí dagur 3 - Þjóðgarðurinn Ala Archa
Við ökum til Ala Arhca sem er í um 40 km fjarlægð frá höfuðborginni. Við skoðum okkur um á þessum fallega stað og virðum fyrir okkur snævi þakta fjallstinda, á og læki með fallega fjallasýn.
Möguleiki er að fara í góða 12 km göngu eða taka því rólega og njóta þess sem garðurinn hefur upp á að bjóða. Við kaupum okkur nesti á leiðinni í garðinn og verjum bróðurpartinum af deginum á þessum fallega stað.
Borðað á fallegum veitingastað í borginni um kvöldið og áfram gist á Plaza hotel.
.jpg)
29. maí dagur 4 - Haldið til Burana og Chon Kemin þorpsins
Við borðum morgunverð áður en við skráum okkur út af hótelinu. Búast má við um 200 km akstri yfir daginn. Ferðin okkar hefst með heimsókn í Burana-turninn sem er forn bænaturn í Chuy-dalnum í norðurhluta Kirgistan. Hann er staðsettur um 80 km frá höfuðborginni, nálægt borginni Tokmok. Turninn varðveitir muni úr grafreitum, kastalarústir og þrjú grafhýsi. Þetta er allt sem eftir stendur af hinni fornu Balasagyn-borg sem var stofnuð af Karakhanidunum í lok níundu aldar.
Hádegisverð borðum við hjá kirgiskri fjölskyldu. Eftir það höldum við áfram að Chon Kemin-gljúfrinu. Þetta er einstakur staður þökk sé ótrúlegri fegurð og ríkulegri fjölbreytni dýra og plantna. Eftir komu á gistiheimilið höfum við tækifæri til að ganga upp að Chon Kemin sem er fallegur útsýnisstaður yfir gljúfrið með víðáttumikla fjallasýn. Hækkun ca. 200 m. Þeir sem vilja frekar geta farið fetið á hestbaki (ekki innifalið).
Kvöldverð borðum við á gistiheimilinu Jekshen þar sem við gistum.
https://maps.app.goo.gl/dZBK9wxN1GekFGCa9
.jpg)
30. maí dagur 5 - Bærinn Kyzyl Tuu, arnarveiðar í Bokonbaevo og Ton
Í dag er ferðinni heitið að Yssyk Kul vatninu sem er annað stærsta fjallavatn í heimi. Vatnið er svo sannarlega stórt og við munum verja næstu dögum víðsvegar í kringum vatnið. Við heimsækjum fjölskyldu í þorpinu Bokonbaevo sem sýnir ýmislegt um gerð hirðingjatjalda og við fáum að reyna okkur við að reisa eitt slíkt.
Næst er ferðinni heitið til Bokonbaevo, þar sem við fáum að fylgjast með örnum sem sérstaklega eru þjálfaðir fyrir veiðar, en arnarveiði er ein af þjóðarhefðum Kirgisa. Við hittum fyrir arnaveiðimann með fuglinn sinn og fáum að fylgjast með hraða arnarins og aðferðum við veiðarnar.
Við fáum hádegisverð í hirðingjataldi (yurt) hjá fjölskyldu sem rekur veitingastað þar. Við höldum svo ferðinni áfram til Ton sem stendur við vatnið þar sem við munum upplifa fyrstu nóttina okkar í hirðingjatjaldi. Þar er hægt að slaka á og fá sér sundsprett í vatninu.
Um kvöldið borðum við saman í tjaldbúðunum í Elestet.
https://elestet-issykkul.com/
.jpg)
31. maí dagur 6 - Ton– Skazka Canyon - Jety Oghuz gorge
Við tökum morguninn rólega og hægt að fá sér göngutúr um þorpið Ton eða meðfram vatninu. Þaðan höldum við inn í hið stórkostlega Skazka gljúfur með sem sýnir okkur ótrúlegar klettamyndanir og eru oft kölluð ævintýragljúfrin. Við skoðum okkur um og virðum fyrir okkur það sem fyrir augu ber. Stutt ganga um gljúfrið gæti verið um 3 km en nauðsynlegt er að vera með skó með góðu gripi.
Við höldum ferðinni áfram til Jety Oghuz sem er annar undursamlegur staður með klettamyndanir og landslag sem kallað hefur verið „Sjö nautshöfuð“. Þar er margt sem gleður augað. Steinninn „broken heart“ varðar innganginn að gljúfrinu á sérstakan og rómantískan hátt.
Við borðum í hirðingjatjaldi í glúfrinu en höldum svo áfram í næturstað sem við gistum í næstu tvær nætur.
Staðurinn heitir Eco Lodge Village þar sem boðið er upp á ýmsa dægradvöl fyrir þá sem vilja, t.d. hjólaleigu, gönguleiðir og Sauna.
https://www.instagram.com/ecovillage_lodge/
.jpg)
1. júní dagur 7 - Karakol bærinn
Eftir morgunverð förum við í nærliggjandi borg sem heitir Karakol og skoðum þar fræg kennileiti. Karakol er fjórða stærsta borgin í Kirgistan, en ásýndar er hún frekar þorpsleg þar sem tíminn líður hægt og eins og hann hafi staðnað í Sovét-tímanum.
Við heimsækjum Dungan moskuna, einstaka byggingu sem líkist kínverskri pagóðu.
Við höldum áfram til rétttrúnaðarkirkju hinnar heilögu þrenningar, sem trékirkja sem byggð er án þess að nota einn einasta nagla.
Dungan er þjóðflokkur og samfélag múslima sem flutti frá Kína og settist hér að. Einnig gefst tækifæri til að fara í safn sem kennt er við rússneskan vísindamann og jarðfræðing.
Í hádeginu förum við til fjölskyldu af Dungan uppruna þar sem við fáum hádegisverð en fáum líka kennslu í að gera sérstakar dungan núðlur.
Við förum aftur á gistiheimilið, kannski með viðkomu í minjagripaverslun en eftirmiðdagur og kvöldið er frjálst. Kvöldverður á gistiheimilinu.
.jpg)
2. júní dagur 8 - Jyrgalan dalur Valley
Eftir morgunverð keyrum fallega leið inn í hinn afskekkta Jyrgalan dal. Vegurinn liggur um fjallshlíðar og blómlega dali, lítil þorpp sem býður upp á skemmtilegt myndefni. Bærinn sem við dveljum í er gamall námubær sem hefur verið breytt í fjallaþorp sem þjónar ferðalöngum.
Hádegisverður á gistiheimilinu en eftirmiðdagurinn er frjáls og um að gera að nota tækifærið og fara í góða göngu, t.d. upp á fossi sem er í um 4 km fjarlægð. Hækkun um 200 m. Einnig er möguleiki að fara á hestbak og skoða umhverfið af baki með leiðsögumanni. Eins má bara rölta um bæinn og kynna sér hvernig þorpsbúar búa.
Gist á Beymaral gistiheimilinu eða á sambærilegum gististað.
https://maps.app.goo.gl/B2nEVCAMVj6WWGDPA
.jpg)
3. júní dagur 9 - Semenovka glúfrið og Cholpon Ata
Í dag er ferðinni heitið inn í fallegt glúfur þar sem ætlunin er að fara í góða göngu upp að fjallavatni. Semenovka sem er talinn einn fallegasti staðurinn við Issyk-Kul vatnið. Þar finnum við fyrir furutré og grænar fjallshlíðar og heyrum vatnsniðinn í ánum. Málsverður verður í „picnic“ stíl í miðjunni á þessum einstaka stað.
Ganga dagsins: Meðalerfið, nokkur hækkun til að byrja með en svo frekar létt. Lengd: 10 km, 500 m hækkun. Tími: 3-4 klst. Lagt af stað úr 2.100 m hæð og endað í 2.600 m hæð.
Að þessari hreyfingu lokinni förum við til bæjarins Cholpon Ata sem er þekktur sem er frægasti sumarleyfisstaðurinn við strendur Issyk-Kul vatnsins. Hér áður fyrr fór vagnarnir hér framhjá á silkileiðinni. Í dag koma hingað ferðamenn hvaðanæva að úr löndum fyrrum Sovétríkjanna (CIS) til Cholpon-Ata. Bærinn er þekktur fyrir hreinar, sandstráðar strendur og tært vatnið.
Kvöldverður og gisting á Olimp hótelinu.
https://olimphotelkg.com/
.png)
4. júní dagur 10 - Cholpon Ata - Kochkor – og Son Kul fjallavatnið
Við byrjum daginn á safni úti undir berum himni sem er á stað þar sem fornar steinaristur fundust. Eftir það keyrum við til bæjarins Kochkor þar sem við kynnumst heimafólki og þeirra lífsháttum. Hér gefst tækifæri til að kynnast listinni við að framleiða hefðbundin filtteppi, sem kallast "Shiyrdak" og "Ala Kiiiz". Aðferðin minnir á ullarþæfingu og afurðin er viðurkennd af UNESCO minjaskrá um óáþreifanlegan menningararf.
Blogg um kirgisku filtteppin: https://www.flandrr.is/post/kirgistan-menningararfur
Eftir þessa fræðslu liggur leiðin upp í 3.400 m hæð yfir Moldo Ashu fjallaskarðið. Þaðn komum við niður að Son Kul fjallavatninu sem stenur í i um 3.000 m hæð y.s. Við komum í Yurt tjaldbúðir við vatnið þar sem við njótum gestrisni hirðingjanna, kynnumst lífsstíl þeirra og siðum.
Kvöldverður i Bayish tjaldbúðunum þar sem verður einnig gist. Sameiginleg salerni eru í sér aðstöðu, útivið.
https://maps.app.goo.gl/oWNtMe9DvB1VSLM4A
.jpg)
5. júní dagur 11 - Hestasýning - Kochkor og höfuðborgin Bishkek
Við byrjum daginn á að fylgjast með Kok-boru hestasýningu sem er einskonar þjóðaríþrótt og er einskonar polo á hestabaki. Í dag eru þetta leikar sem eru einskonar blanda af leik og hestareiðum.
Við búum okkur til brottfarar og keyrum þessa fallegu leið yfir fjallaskörð í átt að höfuðborginni. Við höfum tækifæri til að slaka á í rútunni og njóta útsýnisins á leiðinni.
Við stoppum í bænum Kochkor þar sem við fáum hádegisverð hjá fjölskyldu sem þar býr.
Búast má við tæplega 350km akstri í dag. Þegar komið er til Bishkek innritum við okkur á Plaza hótelið en um kvöldið borðum við saman kvöldverð.